කුඩා දරුවන් අතර නිතරම පාහේ අසන්නට ලැබෙන සුලභ රෝගී තත්ත්වයක් ලෙස 'හිසරදය' හැඳින්විය හැක. ඉරුවාරදය නම් ඉතා තදබල හිසරද තත්ත්වය ගැන නොව අපමේ කතා කරන්නේ නිතර අසන්නට ලැබෙන සාමාන්‍ය හිසරද තත්ත්වයයි.

'හිසරදය' සමාජය තුළ එතරම් අවධානයට ලක් නොවන රෝගී තත්ත්වයකි. එය එතරම් ගණන් ගත යුතු නැති ඉතාම සුළු රෝගයක් බව බහුතර මතයයි.

අ‍පෝ හිසරදයක්ද ඕක ටිකකින් ඇරිලා යාවි

වේදනා නාශක පෙති කීපයකින් සුවය ලැබිය හැකි ඉතාම සුළු රෝගයක් සේ බොහෝ අය සිතුවද කුඩා දරුවන්ගේ හිසරදය එයට මුවාවී දරුවාට සිදුකරන හානිය සුළුපටු නැත. නිතර නිතර හිසරදයෙන් පෙළෙන දරුවකුගේ අධ්‍යාපන කටයුතුවලට කරන හානිය ගැන සිතන්න. එසේම මතකයට බාධා කිරීමටද හිසදරයට හැකියාව ඇත. සමාජය හා සමග දරුවාගේ ඇති ගනුදෙනු සහ සම්බන්දතාවලටද හිසරදය බාධා පමුණුවයි. දරුවෙකුගේ පාසැල් ගමන අඩපණ කිරීමටද එය ප්‍රබල ලෙස හේතුවන බව වැඩිහිටියන් දැනගතයුතුම තත්ත්වයකි. එසේම එය දරුවා තුළ සැඟව තිබෙන දරුණු රෝගී තත්ත්වයක් ගැන කියැවෙන සංඥාවක් වීමටද ඉඩකඩ තිබේ.

දරුවා නිතර නිතර හිසරදයක් ගැන පැමිණිලි කරයි නම් ඒ ගැන අවධානයෙන් යුතුව කටයුතු කිරීමට වැඩිහිටියන් දැනුවත් විය යුතුය. හිසදරය හටගන්නා ආකාරය එය මතුවන වාර ගණන, එම තත්ත්වයේ වැඩිවීම ගැන සටහනක් තබාගෙන වෛද්‍ය උපදෙස් කරා යොමුවිම අතිශයින් වැදගත්වෙයි.

දරුවන් අතර හිසරදය වාර්තාවීම ඉහළ අගයක පැවතීම නිසාම ලෝක සෞඛ්‍ය සංවිධානය විසින් මෙය විශේෂ අවධානයක් යොමුකළ යුතු සෞඛ්‍ය ප්‍රශ්නයක් බවට හඳුනාගෙන තිබේ. ඒ නිසාම මේ හා සම්බන්ධයෙන් විශේෂයෙන් දැනුවත් බවක් ඇතිව කටයුතු කළ යුතු බවට සෞඛ්‍ය අංශ දැනුවත් කොට ඇත.

දරුවාට හිසරදය ඇතිවීමට හේතු සොයාබැලීම දෙමාපිය වැඩිහිටියන්ගේ යුතුකමක් සේම වගකීමකි. සමහර දරුවන් පාසැල් යාමට තිබෙන අකමැත්ත නිසා ඉන් වැළකීමට හිසරදය ඇති බව කියන අවස්ථා ඇත. එසේම තවත් සමහර දරුවන් වතුර පානය අඩුකම නිසා හිසරදයට ගොදුරු වන අවස්ථාද තිබේ. අධික ලෙස අව්වේ වෙහෙසවී ක්‍රීඩා කිරීම වැනි සුලභ හේතු කාරණා නිසා හටගන්නා හිසරදය එම හේතුව හඳුනාගෙන එය නිවැරදි කරගැනීමෙන් වළක්වාගත හැකිය. නමුත් මෙවැනි සුළු හේතුකාරණා වලින් බැහැරව දරුවන් පෙළන හිසරදය ගැන නම් වැඩි අවධානයක් යොමු කළ යුතුමය.

ඉතාම කුඩා දරුවන්ට විශේෂයෙන් වයස අවුරුදු 5ට අඩු අයට හිසරදයක් වැළඳුන විට එය නිවැරදිව සන්නිවේදනය කර ගැනීමේ හැකියාවක් නැත. ඒ නිසා අධික ලෙස කේන්ති ගැනීම, හැ¾ඩීම වැනි ක්‍රියා හරහා එළිදකින්නේ ඔවුන්ගේ හිසරදය වීමට බැරි නැත. මේ වයස් කාණ්ඩයේ දරුවන් අතර 8ක් පමණ අය හිසරදයෙන් පෙළෙන බව සමීක්ෂණ හරහා හෙලිදරව්ව තිබේ. එසේම වයස අවුරුදු 8-12 අතර දරුවන් අතර 80ක් පමණ දෙනා හිසරදයෙන් පෙළෙන බවටද තොරතුරු ඇත.

ඉතා ඉක්මනින් වෛද්‍ය ප්‍රතිකාර පැතිය යුතු රෝග ලක්ෂණ හා සම්බන්ධයෙන් දැනුවත්ව සිටීමද වැදගත්වෙයි.

ඉතා තද හිසරදයක් සමග වමනය යන්නේ නම් ඉක්මනින් වෛද්‍යවරයෙකු වෙත යොමුවන්න. මෙවැනි අවස්ථාවල දරුවා හිස තදින් අල්ලාගෙන කෑගසන අවස්ථා තිබේ. එසේම හිසරදය හා සමග උණක්, අධික නිදිමත ගතියක්. බෙල්ල ප්‍රදේශයේ මස්පිඩු වේදනාකාරී බවක් ගැන පවසයි. නම් ඒද, ඉක්මන් ප්‍රතිකාර සඳහා යොමුවිය යුතු අවස්ථාවකි. සමහර දරුවන්ට විභාගයක් ළංවන විට අධික ආතති තත්ත්වයන් නිසාද හිසරදය හටගත හැකිය. සමහරවිට තදින් හිස කොහේ හෝ ගැටුනු පසු ඇතිවන තදබල හිසරදය ගැනද විමසිල්ලෙන් කටයුතු කළ යුතුව ඇත. සමහරවිට එසේ වැදී දින කීපයක් ගතවූ පසුව වුවද හිසරදයක් මතුවිය හැකිය. මෙවැනි අවස්ථාවකදී ඉක්මනින් ප්‍රතිකාර සඳහා දරුවා යොමු කළ යුතුය.

තද හිසරදයක් නිසා රාත්‍රියේ එකවර ඇහැරෙන තත්ත්වයක් ඇත්නම් ඒද, ප්‍රතිකාර කරා යොමුවිය යුතු අවස්ථාවකි. උදේ පාන්දර ඇහැරුනු විට හිසරදය, සමග වමනය හට ගන්නේ නම් ඒ සඳහාද ඉක්මන් ප්‍රතිකාර වලට යොමුවිය යුතුය. දරුවාට හිසරදය හැදෙන වාර ගණන වැඩිවූ විට එසේම හිසරදයේ ස්වභාවය වෙනස් වූ විටෙක ඒ ගැන නිවැරදි තොරතුරු වෛද්‍යවරයාට පවසා ප්‍රතිකාර ලබාගැනීම අත්‍යවශ්‍ය වේ.

සමහර විට ඔබ නොතකා හරින දරුවෙකුගේ හිසරදය, කනේ ආබාධයක්, පෙනීමේ ආබාධයක් නිසා හටගත්තක් විය හැකිය. එසේම එය මොළයේ ආවරණ පටලය ඉදිමීමක් නිසා හටගත්තක් වීමටද බැරි නැත. එසේම කලාතුරකින් එය මොළයේ ගැටිත්තක් ගැන ඉඟිකරන සංඥාවක් රෝග ලක්ෂණයක් වීමටද පිළිවන. එබැවින් දරුවාගේ හිසදරය ගැන නම් මීට වඩා කල්පනාවෙන් කටයුතු කිරීම අත්‍යාවශ්‍යය.

උපදෙස් කුලියාපිටිය මහ රෝහ‍ලේ ළමා රෝග විශේෂඥ වෛද්‍ය චින්තක රාජපක්ෂ

සාකච්ඡා කළා නිර්මලා කුමාරි සේනාරත්න

කිසියම් දිනයක ඔබ මුත්‍රා දැවිල්ලෙන් පීඩා විඳ තිබේද? එහෙත් එම තත්ත්වය එදා ඔබ එතරම් බරපතළ ආකාරයෙන් නොසිතන්නට ඇත. බොහෝ අය එලෙස සුළු කොට සිතන මුත්‍රා දැවිල්ල ජීවිත හානියක් දක්වා බරපතළ විය හැකි රෝගී තත්ත්වයක මූලාරම්භය වන්නටද හැකියාව ඇති බව මොහොතකටවත් නොසිතනු ඇත.

ඒ ආකාරයට මුත්‍රා දැවිල්ලක් ලෙසින් අපට දන්වන්නේ මුත්‍රා මාර්ගයට ඇතුළු වූ විෂබිජයක් වන්නට බොහෝ විට හැකියාව තිබේ. එලෙස නිතර දෙවේ‍ලේ අපේ මුවින් පිටවන විෂබිජ යනු කුමක්දැයි දැන් අපි විමසා බලමු.

විෂබිජයක් යනු අපේ පියවි ඇසට නොපෙනෙන ඉතාම කුඩා ජීවියෙකි. කොතරම් සියුම් ජීවියෙකු වුවද එම ජීවියාද ‍පෝෂණය ලබමින්  වැඩෙයි. තම වර්ගයා බෝ කිරීමේ ක්‍රියාවලියේද නිරත වෙයි. එහෙත් විෂ සහිත මෙම ජීවීන් නිසා අපට කරදර වීමටද ඕනෑ තරම් හැකියාව තිබේ.

මුලින්ම අපේ ශරීරයට ඇතුල් වන්නේ එකම එක විෂ බිජයක් විය හැකිය. එහෙත් එම එක විෂ බිජය තම වර්ගයා බෝ කරමින් විෂබිජ ගොන්නක් ආකාරයට වර්ධනය වන වේගය පුදුමසහගතය. මිනිසුන් වන අප වසර විස්සක් හෝ තිහක් ගතවනතුරුද බිහි කරන්නේ දරුවන්  දෙදෙනකු හෝ තුන් දෙනෙකු විය හැකිය. එහෙත් විෂබිජයක් ඉපදී විනාඩි විස්සක් ගතවනවිට තවත් විෂ බිජයක් ඊළඟ විනාඩි විස්සේදී එවැනිම වූ විෂබිජ හතරක්ද බිහි කරනු ලබයි. පැයක් ගතවන විටදී එය විෂබිජ හැටහතරක් බවටත් තුන්වන පැය ගත වෙද්දී දාහක් දක්වාත් ඒ එකටම එක විෂ බිජය විකසනය වන ආකාරය ඔබට ඇදහිය නොහැකි තරම් වනු ඇත. මේ ආකාරයට දින කිහිපයක් ගත වන විටදී ලෝක ජනගහනය ඉක්මවා යන තරමේ  විෂබිජ කන්දරාවක් බිහිවන ආකාරය ඔබට සිතා ගන්නට  අසීරුවන්නේ නැත.

මේ ආකාරයේ විෂබිජයක් මුත්‍රා මාර්ගයට ඇතුළු වන්නේ කෙසේද? අප මුත්‍රා ඉතා අපිරිසිදු දෙයක් ආකාරයට සැලකුවද මුත්‍රා මාර්ගය ඉතාමත් පිරිසිදු බවෙන් යුතු ප්‍රදේශයකි. ඒ නිසාම මුත්‍රා මාර්ගයේ කිසිදු විෂබිජයක් රැදෙන්නේ නැත. එහෙත්  අපේ සම, දත් ආදිය විෂබිජවලින් ගහණ ජීවන ලෝකයට  නිරන්තරයෙන්  නිරාවරණය වී පවතී. මුත්‍රා විවරයද පවතින්නේ පිටතට නිරාවරණය වූ ආකාරයටය.

මෙවැනි පසුබිමක් තුළ ඉතා පහසුවෙන් මුත්‍රා මාර්ගයටද විෂබිජ පිවිසීමට හැකියාවක් පැවැතියද උපන්දා සිට නිතිපතා මුත්‍රා පිටකරන වාරයක් වාරයක් පාසා පිරිසිදු මුත්‍රාවලින් සේදී සේදී එවැනි විෂබිජ ඇත්නම් ඒවා පිටතට බැහැර කිරීම සිදු කරයි. ඒ ආකාරයට මුත්‍රා මාර්ගයේ යම් විෂබිජ ප්‍රමාණයක් ඇත්නම් ඒ සියල්ල ඉන් පසුව ලැඟුම් ගන්නේ අපේ  ශරීරයෙන් පිටත ප්‍රදේශයේ බව දැන් ඔබට පැහැදිලි වනවා ඇත. ඒ අනුව මුත්‍රා මාර්ගය සාමාන්‍යයෙන් විෂබිජවලින් තෙත් වූ කලාපයක් බවට පත්වේ.

විෂබිජයකට මුත්‍රාමාර්ගයට පිවිසීම ඒ ආකාරයට එතරම් පහසු නොවූවද යම් හිඬැසක් ප්‍රයෝජනයට ගනිමින් මුත්‍රා මාර්ගය දිගේ ශරීරය තුළට විෂබිජ පැමිණෙන අවස්ථා තිබේ.  එලෙස පැමිණෙන විෂබිජයක් මුලින්ම  නතර වන්නේ බැලුමක ආකාරය ගත් මුත්‍රාශයටය. අපේ ශරීරයේ යටි බඩ ප්‍රදේශයේ ඇති මුත්‍රාශයට  මුත්‍රා එකතු වීම සිදුවේ. එම මුත්‍රා ප්‍රමාණය   මුත්‍රාශයට දරා ගන්න  නොහැකිතරම් වූ විට මුත්‍රා පහ කිරීමේ අවශ්‍යතාව අපට දැනෙන්නට  පටන් ගනී. මුත්‍රාශය  මිරිකීමත් සමග මුත්‍රාශයේ ඇති මුත්‍රා යම් ප්‍රමාණයක් බැහැර වීම සිදුවේ.

මුත්‍රාශය එකවරකදී මිරිකීමේදී නැතිනම් මුත්‍රා පහ කිරීමේදී මුත්‍රාශයේ ඇති සියලුම මුත්‍රා බැහැර කරන්නට හැකි වන්නේ නැත. මුත්‍රා පහකරන වාරයක් වාරයක් පාසා මුත්‍රා ස්වල්පය බැගින් මුත්‍රාශයේ ඉතිරි  වන්නේ තේ කෝප්පයක ඉතිරි වී ඇති තේ විසි කළද බිංදු කිහිපයක් හෝ කෝප්පයේ අඩියේ ඉතිරිවන ආකාරයටය. මුත්‍රා පිරුණු මුත්‍රාශයක් කිසිවිට සහමුලින්ම හිස් නොවීමේ මෙම ස්වභාවය මුත්‍රා මාර්ගයට ඇතුළු වූ විෂබිජයකට රජ මඟුලක් බවට පත් වන්නකි. ඒ ආකාරයට   බැරිවීමකින් හෝ මුත්‍රා මාර්ගය දිගේ මුත්‍රාශයට පිවිසෙන විෂබිජයක් 'මීට වඩා තවත් හොඳ තැනක් මට නැතැයි' එහිම ලැඟුම් ගන්නට උත්සාහ  දරනු ඇත.

මුත්‍රාශයට මුත්‍රා ගලා එන්නේ ඊට ඉහළින් මුත්‍රාශය දෙපසින් පිහිටා ඇති නාල දෙකක් ඔස්සේය. ඉන්පසුව එම විෂබිජය නාල තුළටද ගමන් කළ හැකිය. ඊටත් ඉහළට වන්නට ඇත්තේ වකුගඩුය. වකුගඩු තුළ ඇති මුත්‍රා එකතුවන කුහර තුළටද විෂබිජය ගමන් කළ හැකිය.  එවිට එම වකුගඩුව ඇති පැත්ත වේදනා ගෙන දෙයි. ‍ලේ වලට විෂබිජය ගමන් කරන්නට පටන් ගන්නේ එවිටය. එලෙස විෂබිජය ‍ලේ වලට ගමන්  කිරීම වේවලා වෙව්ලා උණ හට ගනිමින් මුළු ශරීරයම කඩා වැටීමකට ලක් කරවන බරපතළ තත්ත්වයකි. එහි  අවසානය මරණයෙන් කෙළවර වන්නටද ඕනෑ තරම් හැකියාව තිබේ.

තමන්ට ඉතා සුදුසු පරිසරයක සීඝ්‍රයෙන් වර්ධනය වන විෂබිජය මෙම වකුගඩු තුළ යම් ප්‍රදේශයක තමන්ගේම රාජධානියක් ගොඩනංවා ගන්නා අවස්ථාද තිබේ. වකුගඩුව තුළ තමන්ට හිමි එම ප්‍රදේශය බළකොටුවක් බවට පත් කර ගනිමින්  ඒ තුළ විෂබිජවලට පමණක්ම රැඳෙන්නට හැකි පරිසරයක් නිර්මාණය කර ගනී. දැන් එය එකම  සැරව ගෙඩියකි. ඊට කිසිදු ඖෂධයක් ක්‍රියාකාරී වන්නේද නැත. අවසානයේ කරන්නට ඉතිරි වන්නේ ශල්‍ය කර්මයක් පමණක්ම විය හැකිය.

මේ තරම් බරපතළ  තත්ත්වයකට පත් වන්නට පෙර අපට එය ගොඩින් බේරා ගන්නට අපහසු නැත. මුත්‍රා අමාරුවක් වැලඳුනු වහාම වෛද්‍යවරයෙකු වෙත යෑම මෙහි මුල්ම පියවරයි. එවිට  වෛද්‍යවරයා රෝගියා සඳහා UFR ( urine full Report) සහ කල්චර් (culture) පරීක්ෂණ නිර්දේශ කරනු ලබයි. UFR  යනු මුත්‍රාවල සැරව පවතී දැයි හඳුනා ගන්නට කරන පරීක්ෂණයයි.

කල්චර් පරීක්ෂණයක් යනු විෂබිජ, ‍පෝෂණ මාධ්‍යක් තුළ  වීදුරුවක වැඩෙන්නට සලස්වා කරන  පරීක්ෂණයකි. දින තුනක් ගත වන විට වීදුරුව මත විෂබිජය වර්ධන වී ඇති ආකාරයක් දැකිය හැකිය. ඒ මත විසිරුවා ඇති බෙහෙත් පෙති දෙස අවධාරණය  යොමු  කළවිට කුමන පෙත්ත වටා ඇති විෂබිජය වඩා වැඩිපුර විනාශ වී ඇතිද යන්න වෛද්‍යවරයා වටහා ගනී. ඒ ආකාරයට විෂබිජය විනාශ කිරීමේ ප්‍රබලත්වයෙන් වඩා වැඩි ඖෂධය රෝගියාට නිර්දේශ කිරීම සිදු කරයි.

එහෙත් හිතුමතේ ඖෂධ ගන්නට පුරුදු වී සිටින සමහර රෝගීන්  ෆාමසියකට ගොස් යම් ප්‍රතිජීවක ඖෂධයක් ගෙන අත්හදා බැලීම් සිදු කරන අවස්ථා තිබේ. අහම්බෙන් එවැනි ප්‍රතිජීවක ඖෂධයක් වැඩ කරන අවස්ථාද තිබිය හැකිය. එහෙත් එසේ නොවී අත්හදා බැලීම වැරදී ගියහොත් යළි කල්චර් පරීක්ෂණයකින්වත් කිසිවක් හසුකර ගත නොහැකි සංකීර්ණ තත්ත්වයක් උදාවිය හැකිය.  එය  ඔබට වටහා ගන්නට පහසු සරල උදාහරණයකින් මෙසේ  පැවැසිය හැකිය.

රෑ මැදියමේ පිටතින් ඇසෙන හඬකින් සොරුන් පැමිණ ඇතැයි සිතන අයෙකු ‍පොලීසියට ඒ බව දැන්විය හැකිය. එහෙත් ‍පොලීසිය පැමිණෙනතුරු ඉවසා සිටින්නේ නැති  මෙම පුද්ගලයා තමන්ට වෙඩි තියන්නට හුරු නැති වුවද හොරු සිටින දිශාවට හතර අතේ වෙඩි තැබුවහොත් කුමක් සිදුවේද? අහම්බෙන් සොරෙකුට වෙඩිල්ලක් වඳින්නටද හැකියාවක් තිබේ. එහෙත් වැඩි හැකියාවක් ඇත්තේ හොරුන්ට  වහං වීමටය. ‍පොලීසියට ඉතා පහසුවෙන් යටත් කර ගන්නට හැකියාව තිබූ හොරුන්ට සැඟව යන්නට අවස්ථාව ලබා දෙන්නේ එලෙස  ගෙහිමියාමය. මුත්‍රා අමාරුවකට හිතුමතේ ප්‍රතිජීවික ඖෂධ ලබා ගැනීමක්ද එවැනි තත්ත්වයකට දවෛනි වන්නේ නැත.

සමහර රෝගීන් මුත්‍රා දැවිල්ල හෝ උණ පහව ගිය වහාම වේදනා නාශක පෙති ගැනීම නතර කර දමන ආකාරයට ප්‍රතිජීවක ඖෂධද නවතා දමති. වේදනාව නතර වුවද විෂබිජවලින් කොටසක් ශරීරය තුළ වර්ධනය වෙමින් පවතින පසුබිමක ප්‍රතිජීවක ඖෂධ බාගෙට ගෙන නතර කිරීම නයාට ගසා ‍පොල්ල වරද්දා ගැනීමකි.

ඊළඟ අවස්ථාවේදී විෂබිජය දෙතුන් ගුණයකින් වර්ධනය වී ප්‍රහාර එල්ල කරන්නට පටන් ගත් විට තත්ත්වය වඩාත් බරපතළය. නිශ්චිත දින ගණනකට  වෛද්‍යවරයකු යම් ප්‍රතිජීවක ඖෂධයක් නියම කරන්නේ එම විෂබිජය සමූල ඝාතනය වන ආකාරයටය. එය අතරමග නතර කිරීමේ අවදානම බොහෝ අය හිතනවාට වඩා අතිශය බරපතළ විය හැකිය.

පුරුෂ පාර්ශ්වයට නම් හේතුවක් නැතිව මුත්‍රා අමාරුවක් වැලඳෙන්නට වැඩි හැකියාවක් නැත. මුත්‍රා මාර්ගයේ ගලක් වෙනත් අවහිරතාවයක් නිසා මෙන්ම මුත්‍රා මාර්ගය කෙළවර පෙරසම පසුපසට නොයෑම හේතුවෙන්ද මුත්‍රා අමාරු ඇතිවිය හැකිය. මුත්‍රා කරන ස්ථානයේ පෙරසම පසුපසට නොයෑම, තමන්ට පමණක් ඇති ගැටලුවක් බව එම තත්ත්වයෙන් පෙළෙන සමහරුන්  නොදන්නා අතර එය සාමාන්‍ය තත්ත්වයක් යැයි සිතා සිටින අවස්ථා තිබේ.

එවැනි තත්ත්වයන් හඳුනාගෙන ප්‍රතිකාර නොකළහොත් නැවත නැවත මුත්‍රා පැසවීම සිදුවිය හැකිය.

කාන්තාවන්ගේ මුත්‍රා මාර්ගය පුරුෂ පාර්ශ්වයේ මෙන් දිගින් වැඩි නැත. මුත්‍රා මාර්ගයේ මෙම කෙටි බව නිසා ඉතා ඉක්මනින් කාන්තාවන්ගේ මුත්‍රාශයට විෂබිජ ඇතුළු වන්නට වැඩි හැකියාවක් පවතී.

දියවැඩියාවෙන් පෙළෙන අයෙකුට හට ගන්නා මුත්‍රා පැසවීමක් කරදර ගණනාවකට මං හදන්නක් විය හැකි නිසා විශේෂයෙන්  දියවැඩියාවෙන් පෙළෙන රෝගීන් මුත්‍රා අමාරු සුළුවෙන් තැකිය යුතු නොවන්නකි.

ශරීරයකට ඇතුළුවන විෂබිජයක් දියත් කරන සටන සුළුපටු නොවේ.  විෂබිජයක් දිනෙන් දින වෙනස් වෙමින් වර්ධනය වන ස්වභාවය නිසා  වෛද්‍යවරුන්ටද නිශ්චිත ප්‍රතිකාරයකට පිවිසීමට එකවරම කළ හැකි දෙයක් නොවේ. ඒ නිසාම මුල් දිනවලදී වෛද්‍යවරයෙකු විෂබිජයකට ඖෂධ ලබා දෙන්නේ සැකය පදනම් කරගෙනය.

වෛද්‍යවරයාටද යමක් කරන්නට යම් කාලයක් අවශ්‍යයි. රෝගීන්ගේ පැත්තෙන් කරන්නට ඇති හොඳම දෙය නම් වෛද්‍යවරයාට යමක් කරන්නට ඒ කාලය ලබා දෙමින් හැකි ඉක්මනින් ප්‍රතිකාර කරා යොමු වීමයි.

කරාපිටිය ශික්ෂණ රෝහ‍ලේ කායික රෝග විශේෂඥ  වෛද්‍ය උපුල්ද සිල්වා අවධාරණය කරයි

උත්පලා සුභාෂිනී  ජයසේකර

හචිස්....හචිස්.... දරුවෝ මූණ රතු කරගෙන සොටු දියර ගලමින් අපහසුවෙන් ඉන්නකොට අම්මලාට හරිම දුකයි. රෑට නින්දක් නෑ. දරුවන්ට හුස්ම ගන්න බැහැ. ඒත් මේකට අපිට ගෙදරදීම පිළියම් කිහිපයක් අනුගමනය කරන්න පුළුවන්.

හෙම්බිරිස්සාව සමහර වෙලාවට මාස කිහිපයකට සැරයක් නැත්නම් ඊටත් වඩා ළඟ ළඟ හැදෙනවා. ඇත්තටම ඔවුන් පෙර පාසල් හෝ පාසල් යනවා නම් මේ ලෙඩේ වළක්වන්න අමාරුයි.

හෙම්බිරිස්සාව එන්නේ තවත් අපහසුතාවයන් කිහිපයකුත් අරගෙනයි. කිවිසුම් යාම, කැස්ස, නහයේ හිර ගතිය, උගුර රිදීම, ඒත් මේ අතර වතුර වගේ සොටු දියර ගැලීම ‍පොඩ්ඩන්ට දරාගන්න අමාරුයි. මේ වගේ සොටු දියර ගැලීම අසාදන අසාත්මිකතාවයන් නිසාත් ඇති වෙන්න පුළුවන්.

ඉතින් ගොඩක් වෙලාවට ‍පොඩ්ඩෝ නහයෙන් වතුර වගේ සොටු දියර ගලන කොට අතින් නැත්නම් ඔවුන් ඇදගෙන ඉන්න ඇඳුම්වලින්, නැත්නම් බිත්තිවල, නැත්නම් ඒ ගොල්ලන්ගේ සහෝදර සහෝදරියන්ගේ ඇඟේ ආදි වශයෙන් තැන් තැන්වල ගානවා.

අස්වැසිල්ලකට එක කාරණයක් තමයි හෙම්බිරිස්සාව හැදෙන සොටු දියර ගැලීම එතරම් කරදරයක් දෙන්නේ නැති එකයි. මේ තත්ත්වය සමහරුන් ෆාමසිවලින් ගත හැකි Antihistamines වැනි බෙහෙත් වර්ග තියෙනවා.

ඉන් දරුවන්ගේ නහයෙන් සොටු දියර ගැලීම, ඇස්වලින් කඳුළු ගැලීම ආදී අපහසුතාවයන් නැති වෙනවා. නමුත් ඉන් දරුවන් නිද්‍රාශීලීකත්වය ඇති වෙන්න පුළුවන්.

බොහෝ දරුවන්ට විශේෂඥයින් හෙම්බිරිස්සාවට ෆාමසිවලින් හිතුමතේට ලබාගන්න බෙහෙත් වර්ග අනුමත කරන්නේ නැහැ. මන්ද ඉහත සඳහන් කළ පරිදි ඉන් වෙනත් අතුරු ආබාධ ඇති වීමට බොහෝ ඉඩකඩ තියෙනවා.

දරුවන්ට නහයෙන් සොටු දියර ගැලීම හැදෙන්නේ කොහොමද?

1. ආසාදන නිසා

මේ නිසා සොටු දියර ගැනීම සමග ඇස් රතුවීම හා ඇස් කැසීම සිදුවෙනවා.

2. අලුත උපන් දරුවාට ඇති වන සිරවීම්

කිසිම හේතුවක් නැතිව ඔබේ අලුත උපන් පුංචි පැටියාගේ නාසයෙන් සොටු දියර ගලනවා නම් ඒ ඔවුන් මෙලොව එළිය දකින මොහොතේ යම් යම් තරලයක් නාස් මාර්ගයේ රැඳීම නිසා ඇතිවන තත්ත්වයක්.

3. ශීත කාලගුණයට නිරාවරණය වීම නිස

කිසිම හේතුවක් නැතිව දරුවන්ගේ නාසයෙන් සොටු දියර ගලනවා නම් ඒ ශීත කාලගුණයට හා එහෙත් නැත්නම් සැර කෑම ජාති ආහාරයට ගැනීම.

4. සුලබ හෙම්බිරිස්සාව

සාමාන්‍ය හෙම්බිරිස්සාව හැදුන දරුවෙකුට යාන්තමට උණ, කැස්ස, උගුරේ අමාරු කිවිසුම් යාම ඇති වෙන්න පුළුවන්.

5. ඉන්ෆ්ලුවැන්සාව

ඉන්ෆ්ලුවැන්සාව නැතිනම් හෙම්බිරිස්සා ආසාදනය සමග උණ (Flu) ඇති වීම හෙම්බිරිස්සාවට වඩා දරුණු තත්ත්වයක් විදිහට හඳුන්වන්න පුළුවන්. Flu හෙවත් හෙම්බිරිස්සාව සමග උණටත් නහයෙන් සොටු දියර ගැලීම, මාංශපේශීන් රිදීම, උගුරේ අමාරු, කරකැවිල්ල, ආහාර අරුචිය වැනි රෝග ලක්ෂණ හා අපහසුතා ඇති නිසා.

6. නන්නාඳුනන යමක් නහයේ හිරවීම

දරුවෙකු යමක් නාසයේ සිරකර ගත්තොත් ඒ නිසාත් සොටු දියර ගැලීම, සමහර විට ‍ලේ පිටවීම වුවත් සිදුවෙන්න පුළුවන්.

නමුත් සොටු දියර ගැලීම වැඩිපුර සිදුවන්නේ හෙම්බිරිස්සාව නිසයි. ඉතින් එයට ෆාමසිවල නම් ඕනේ තරම් බෙහෙත්. ඒත් මේ සඳහා ඔබ ගෙදරදීම කළ හැකි පිළියම් කිහිපයක් සලකා බැලුවොත් නරකද?

1. සේලයින් ස්ප්‍රේ සහ නහයේ සිරවීම පාලනය

නාසය සූරන්න බැරි පුංචි දරුවන්ට මේ ක්‍රමය ඉතා හොඳයි. නාසයට හරියටම සේලයින් ස්ප්‍රේ කිරීමෙන් නාසයේ ඇති තරලය ඉවත් කළ හැක. සේලයින් ස්ප්‍රේ කුඩා දරුවන්ට හරිම හොඳයි.

පාවිච්චි කරන්නේ කොහොමද?

• ඔබේ දරුවාට පහසු ලෙස උකුලට ගෙන හිස තරමක් පහත් කරන්න.
•  ඉතා මෘදු ලෙස එක බින්දුවක් නහයට ඇතුළු කරන්න.

මිනිත්තු දෙකකට පමණ පසු aspirator එකක් මාර්ගයෙන් තරලයන් නාස් මාර්ගයෙන් ඉවත් කරන්න. මෙය අනෙක් නාස් මාර්ගයෙනත් එලෙසම කරන්න.

2. නාසය සූරන්න

මෙය වඩාත් පහසුයි. දරුවන්ට නාසය සූරන ආකාරය හා නාසයේ ඇති තරලය සූරා දැමීමට කියා දෙන්න. ඔහුට ටිෂූ පාවිච්චිය දීම හොඳයි. ඒ වගේම ඒවා වඩා සුදුසු ලෙස කුණු බදුනකට දැමීමට කියලා දෙන්න.

3. හුඟක් වතුර හා බිම වර්ග බොන්න

වතුර, සුප්, පලතුරු යුෂ, බිම වැනි දේ බොන්න දුන්නොත් නාසයේ ඇති තරලයන් ඉක්මනට ඉවත්ව යනවා.

4. උණුසුම් වතුරෙන් නෑම

හුමාලය සහිත උණුසුම් වතුර නෑමෙන් දරුවාගේ නාස් කුහර තුළ නාසයෙන් සොටු දියර ගැලීම ඇති කරන තරලයන් ඉවත් කිරීමත් පහසු කරනවා.

5. එතරම් සැර නැතිව සාදා ගත් ඉඟුර තේ

සමහර දරුවන් සොටු තරලය ඉවත් නොකර ගිල දමනවා. එක ඔවුන්ගේ බඩට එතරම් හොඳ නැහැ. මේ නිසා ඉඟුරු ටිකක් එකතු කරලා තේ ටිකක් දුන්නහම ‍පොඩ්ඩන්ගේ බඩට ඉක්මන් සුවයක් ලැබෙනවා. ඉඟුරු ටිකක් ග්‍රේට් කරලා හරි තලලා හරි අරගෙන තේ එකට තැම්බෙන්න තියන්න. ඊට මී පැණි ටිකකුත් දැම්මොත් තවත් හොඳයි. හැබැයි බබාට වයස 1ට වැඩිනම් විතරක් මී පැණි එකතු කරන්න. රසයයි. සුවයයි දෙකම ලැබෙනවා.

6. දරුවාගේ හිස තරමක් උස වෙන්න තබා නින්දට යවන්න

මේ නිසා නාසයේ සිරවීම් නිසා ඇත වෙන අපසුතා වළකනවා. ඉන් දරුවාට නින්දට යාමට පහසුවක් ලැබෙනවා. මීට තුවයක් රෝල් කර හෝ වෙනත් රෙද්දක් යාන්තමට නවා දරුවාගේ කොට්ටයට ආධාරකයක් ලෙස තබන්න. දරුවා ඉතා කුඩා නම් රෙදි කඩක් හෝ තුවායක් පමණක් භාවිත කරන්න.

ඔබ දරුවා රෝහලට රැගෙන යා යුත්තේ කුමන අවස්ථාවේද?

• සොටු දියර ගැලීම සමග දින දෙකකට වැඩියෙන් තද උණ ඇත්නම්.
• උණ, ඇඟ රිදීම, වමනය වැනි රෝග ලක්ෂණ ඇත්නම් (ඉන්ෆ්ලුවැන්සා රෝග ලක්ෂණ)
• නාස් මාර්ගයේ යමක් හිරවී ඇත්නම්
• ආසාදනයක් නිසා සොටු දියර ගලන බව සිතන්නේ නම් සුලබ වගේම කරදරකාරී හෙම්බිරිස්සව හා නාසයෙන් සොටු දියර ගැලීම වැනි කාරණා ගැන අපි නොහිතන දේවල් හුඟක් The Asianparent Sri Lanka අපි මතක් කළේ ඔබේ දරුවාත් ඔබත් නිතර නිරෝගීව තබන්නයි.

හරිහැටි දවස ඇරැඹුවොත් ලෙඩ රැසක් කම්මුතුයි

බොඳ වූ ලිංගික සිහින සහ විවාහය

හිසකෙස්වලට වැටෙන කේස්

කාන්තාවගේ පංච කල්‍යාණයෙන් එකක් ලෙසින් හිසකෙස් හැඳින්විය හැක. පිරිමින්ට වඩා කාන්තාවෝ තම හිසකෙස් සම්බන්ධව වැඩි උනන්දුවක් දක්වති. ආසියාතික රටවලද පංච කල්‍යාණයට ලැබෙන්නේ මුල් තැනකි. විශේෂයෙන් ආසියාතික රටවල්වල රූ රජිණන් තොරද්දි පංච කල්‍යාණිය පිළිබඳ සැලකිල්ලක් දැක්වුවද යුරෝපා රටවල්වල මේ පිළිබඳ එතරම් සැලකිල්ලක් නැත.

වර්තමානයේදී හිසකෙස් සම්බන්ධ බොහෝ දෙනකුට ගැටලු පවතී. විශේෂයෙන් කාන්තාවෝ මේ ගැටලුවලින් විශාල ලෙස පීඩා විඳිති. කෙස් හිසෙහි පිහිටීමෙන් විශාල ප්‍රයෝජනයක් අත්වේ. හිසකෙස් පිහිටන්නේ හිස් කබල මතය. හිස් කබල ඇතුළත මිනිසාගේ ශරීරයේ වටිනාම ඉන්ද්‍රියන් පිහිටා ඇත. මේ නිසා හිසට උත්තමංගය ලෙස හැඳින්වේ. ඇස, කන, නාසය, දිව වැනි ඉන්ද්‍රියන් මෙන්ම මොළය ආදිය ද ආරක්ෂිතව හිස් කබල තුළ පිහිටා ඇත. මේ නිසා මෙයට උතුම් අංගය ලෙසින් හැඳින්වේ. මේ උතුම් වූ අංගයන්හි ආරක්ෂාවට හිස් කබල පිහිටා ඇත. එම හිස් කබලට උඩින් කෙස් පිහිටා ඇත. මේ නිසා කෙස් මගින් හිස් කබල ආරක්ෂා කෙරේ.

කෙස් ඉතා ලිස්සන සුළුය. වැටීමකින් තැලීමකින් හෝ යම් පහර වැදීමකදී හිසකෙස්වලට හිස් කබල ආරක්ෂා කරගත හැක. කෙස් නොමැති තැනකට පහරක් වදිනවාටත් වඩා කෙස් ඇති තැනකදී පහරක් වැදීමේදී ආරක්ෂාකාරී වේ. එමෙන්ම වැස්ස, අව්ව, පිත්ත වැනි ස්වභාවිකව මුහුණ දෙන තත්ත්වයන්වලදී ද හිසකෙස් හිස් කබල ආරක්ෂා කරයි.

හිස් කබල ආරක්ෂාව සඳහා කෙස් පිහිටා තිබුණ ද කාන්තාව බොහෝ විට කෙස් කබල පිළිබඳව උනන්දුව දක්වන්නේ රූපලාවණ්‍ය අවස්ථාවලදීයි. තම රූපය සුන්දර කර ගැනීම සඳහා කාන්තාව තම කෙස් වැටියට විවිධ වද දෙති. විශේෂයෙන් කාන්තාවෝ කෙස් ගසක් දවසකට ගැලවී ගියවිට දුක් වෙති. නමුත් දවසකට කෙස් ගස් සීයක් එකසිය පනහක් පමණ හැලීම සාමාන්‍ය දෙයකි. එය හිසකෙස්වල ප්‍රමාණය අනුව වෙනස් වේ. මිනිස් ජීවිතවල ආයු කාලය මෙන්ම කෙස් ගසෙහිද ආයු කාලයක් පවතී. මෙලෙස ආයු කාලය අවසන් වූ කෙස් ගස ගැලවීමෙන් අනතුරැව ඒ ගැලවී යන කෙස් ගස් මෙන්ම නැවත කෙස් වර්ධනය වීම සිදු වේ.

මෙලෙස නැවත ඇතිවන කෙස් ගස් නිසි ආකාරයෙන් වර්ධනය වීමට නම් ඒ කෙස් ගස් වැඩෙන පසුබිම ශක්තිමත්ව තිබිය යුතුය. වියලි හිසකෙස් කබලක්නම් කෙස් හොඳින් වර්ධනය වීම සිදු නොවේ. මේ නිසා හිස්කබල තෙතමනය සහිත පෝෂණීය හිස් කබලක් විය යුතුය. ගසකට පසක් අවශ්‍ය වන්නේ යම් සේද පෝෂණීය හිසකෙස් සඳහා ද සාරවත් පොළවක් (හිස කබලක්) අවශ්‍ය වේ.

හිසකෙස් ගොයම් ගසකට සමාන කළ හැක. ගොවියා කුඹුරෙහි ගොයම් ගස ආරක්ෂා කරන්නේ යම්සේද ඒ හා සමානව ආරක්ෂාව අප විසින් හිසකෙස්වලට ලබාදිය යුතුය. කේෂ කල්‍යාණයට හානි කරවන හිස්හොරි, උඳුගොව්වන් වැනි තත්ත්වයන් හේතුවෙන් හිසේ ඇති පෝෂණය නැති වී යයි. ඒවායින් හිසකෙස් ගැලවී යාමට පටන්ගනී. කෙස් කළඹේ පෝෂණය නැතිවී යයි. හිස් කබලේ ගුණාත්මකභාවය ද නැතිවී යයි.

හිසකෙස්වල පවතින තවත් ප්‍රබල ගැටලුවක් වන්නේ හිසකෙස්වල උකුණන් ලේඬීන් වැනි කුඩා සතුන් ඇතිවීමයි. මෙයින්ද හිසකෙස්වල ඇති පෝෂණය හීන වෙයි. මීට අමතරව ඇතැමුන් තුළ පවතින ලෙඩ රෝග හේතුවෙන් ද කලක් ගතවෙද්දී කෙස්වල විවිධ ප්‍රශ්න ඇතිවිය හැක. විශේෂයෙන් පීනස වැනි සරල රෝග මඟින්ද හිසකෙස් ගැලවී යාමට පටන් ගනී. එමෙන්ම හිසකෙස් සුදු වන්නට ද පුළුවනි. ආයුර්වේදයේ අකාල කාලිත්‍ය ලෙස සඳහන් වෙන්නේ මේ අකලට හිසකෙස් පැසීමය. අද වෙද්දී පාසල් යන ළමුන්ගේ, අඩු වයසේ පසුවන්නන්ගේ ද හිසකෙස් ඉදීමට ප‍ටන්ගෙන ඇත. පීනස රෝගයට අමතරව විවිධ කාලීන රෝග, නිව්මෝනියා වැනි තත්ත්වයන්හිදී හිසකෙස් ගැලවී යාමට පටන්ගනී. විශේෂයෙන් ඇඳටම වී සිටිය යුතු බරපතළ රෝග තත්ත්වවලදී මෙය බහුලව දැකිය හැක. විශේෂයෙන් පිළිකා වැනි රෝග තත්ත්වවලදී දෙනු ලබන ඖෂධ දිගු කලක් ගැනීමෙන් ද හිසකෙස් ගැලවී යාමට පටන් ගනී.

මීට අමතරව කාන්තාවන් විසින් විහින් කරගනු ලබන ඇතැම් ක්‍රියාවන් හේතුවෙන්ද කල්යත්ම හිසකෙස්වල ප්‍රශ්න ඇතිවීමට ප්‍රබල හේතුවක් වේ. අද බොහෝ කාන්තාවෝ තම සුන්දරත්වය රැකගැනීම සඳහා රෑපලාවන්‍යාගාරවල පිහිට පතති. එතෙක් පැවති තම දිගු නිරෝගී කෙස් කළඹ විවිධ තාක්ෂණික උපකරණයන්වලට හසුකර ගනී. බොහෝ කාන්තාවෝ වෙළඳපොළේ ඇති විවිධාකාකර ෂැම්පු වර්ග, කන්ඩිෂනර් වර්ග යොදා හිස සෝදති. නමුත් බොහෝවිට එවායේ ඇත්තේ රසායනික දුව්‍යයන්ය. ඒවා හිසකෙස්වලට අහිතකර වේ. මීට අමතරව රූපලාවණ්‍යාගාරවලදී හිසකෙස් රීබොන්ඩින් කිරීම, හිසකෙස් කර්ල් කිරීම, හිසකෙස් අයන් කිරීම, ස්ට්‍රේට් කිරීම වැනි නව විලාසිතා කිරීමෙන් සිදුවන්නේ හිස කෙස්වලට හානියකි. රසායනික ද්‍රව්‍යයන් කාලයක් තිස්සේ පාවිච්චි කිරීමෙන් හිස්කබල ආශ්‍රිත ප්‍රදේශයේ නිස්සාරණය වේ. ඇතැම් නව විලාසිතා කිරීමේදී විදුලි උපකරණ මඟින් විශාල උණුසුමකට හිසකෙස් ලක්කෙරේ. මෙවැනි අධික උෂ්ණත්වයකට හිසකෙස් ලක්කිරීමෙන් ඇතිවෙන්නේ විශාල හානියකි. එයට අධික උණුසමට ඔරොත්තු දීමේ හැකියාවක් නැත. මේ නිසා කෙස් ගස්වල මුල හැලීමට ලක්වේ.

ඇතැම් කාන්තාවෝ තම හිසකෙස් එක මිටට තදකර බැඳීමට පුරැදුව සිටිති. මෙයින් සිදුවන්නේ හිසකෙස් දැඩි ලෙස ඇදීමට ලක්වීමය. හිසකෙස්වල මුලට මෙයින් හානියක් සිදුවේ. ඇතැම් කාන්තාවෝ හිසකෙස් එක මිටට රබර් පටිවලින් ගැට ගසති. ඒ විතරක් නොව හිස සේදීමෙන් අනතුරුව හිසකෙස් වියලීමටත් පෙර තෙත හිසකෙස් එකමිටට ගැටගසා ගැනීමට පුරුදුව සිටිති. මෙයින්ද සිදුවන්නේ හිසකෙස්වලට දැඩි හානියකි.

කෙස් නිසි ලෙස වර්ධනය වීමට නොහැකි වන්නටද පෝෂණ ඌණතා තත්ත්වයන් ද දැඩි ලෙස බලපායි. අපි කොතෙකුත් දෑ ආහාරයට ගත්තද ඒවායේත් ඌණතා හේතුවෙන් හිසකෙස්වල වර්ධනයට අවශ්‍ය පෝෂණ පදාර්ථ නොමැති වීමෙන්ද කෙස්වලට හානි ඇතිවිය හැක. කෙස්වලට විටමින් වර්ග මෙන්ම ඛනිජලවණ ද, කැල්සියම් ද ඉතා අවශ්‍ය වේ. මේ නිසා ඒවා වැඩිපුර අඩංගු ආහාර ගැනීම ඉතා වැදගත් වේ. ගැබිණි කාන්තාවන්ගේ මෙන්ම දරුවකුට කිරි දෙන කිරි අම්මාවරැන්ගේද හිසකෙස් ගැලවී යාම ඒ කාලයේදී සිදුවිය හැක. එයට ප්‍රධාන හේතුව වන්නේ කැල්සියම් ඌණතාවයයි.

ආයුර්වේදයට අනුව කෙස්වලට ඉතා ගුණදායක ඖෂධය වන්නේ හිසකෙස්වලට තෙල් ගැල්වීමයි. නමුත් අද වෙද්දී බොහෝ අය අවුරැද්දකට එක් දිනකට පමණක් හිසට තෙල් ගැල්වීමට පුරැදුව සිටිති. ඒ සිංහල අලුත් අවුරැදු නැකැත් චාරිත්‍රයක් ලෙස පවතින හිස තෙල් ගැල්වීමේ දිනය දා පමණි. නමුත් හිසට තෙලක් දැමීම සඳහා දිනයක්, වේලාවක්, නැකතක් තිබිය යුතු වන්නේ නැත. එයට සීමා කළ යුතු තත්ත්වයන්ද නොවේ. අද වෙද්දී බොහෝ තරුණ පරපුර තෙල්වලට දක්වන්නේ දැඩි අප්‍රසාදයකි. හිසට තෙල් වෙනුවට ජෙල් ගෑමට, ක්‍රීම් ගෑමට පුරුදුව සිටිති. නමුත් මුදල් දී ජෙල් ගැනීමෙන් සිදුවන්නේ තම හිසකෙස්වල ගැලවී යාමට මාවතක් විවෘත කිරීම පමණි. මේ හිසකෙස් අකලට පැසීමෙන් තරුණ පෙනුම වෙනුවට මුදල් දී වියපත් පෙනුමක් ලබා ගනිති. මේවායේ ඇති අධික රසායනික ද්‍රව්‍ය ‍කෙස්ගසට හානිදායක වේ.

ආයුර්වේදයේ සඳහන් වන ආකාරයට හිසට තෙල් ගෑම ඉතා වැදගත් වේ. මෙමගින් හිසෙහි ඇතිවන්නා වූ රෝග බොහෝමයක් සුව කර ගැනීමට හැකි වේ. හිසේ කැක්කුම දුරු කරයි. එමෙන්ම කෙස්වල මෘදු බව ඇති කරයි. හිසෙහි තෙල් ගැල්වීමෙන් කෙස් දිගු වේ. එමෙන්ම බොහෝ දෙනෙක් කළු හිස කෙස් සඳහා වැඩි ප්‍රියතාවයක් දක්වති. මේ නිසා ඉතා දිලිසෙන කළු පැහැකි කෙස් කළඹක් තෙල් ගැල්වීමෙන් ලබා ගත හැකිය. හිසට තෙල් ගැල්වීමෙන් හිසට පමණක්ම නොව ඇස, කන, නාසය වැනි ඉන්ද්‍රියන් ද ක්‍රියාශීලී කරයි. එමෙන්ම මුහුණ ද පැහැපත් වේ. මේ නිසා නිසි තෙලක් යෙදීම ඉතා වැදගත් වේ. අද වෙද්දී වෙළෙඳපොළේ විවිධ නාමයන් යටතේ හිසට ගල්වනු ලබන තෙල් විකිණීමට  තිබෙන නමුත් මේ සියලු තෙල් වෙනුවට ඖෂධීය තෙලක් පාවිච්චිය යහපත්ය. හිසට ගැල්විය යුතු හොඳම තෙල වන්නේ තම නිවසේදීම සාදා ගන්නා ලද හින්දවූ තෙලකි. ඒ සඳහා තැඹිලි හෝ පොල් යොදාගත හැකිය. ආයුර්වේදයේ නිවසේ හින්දවනු ලබන මේ තෙල අත් තෙල ලෙස හැඳින්වේ. එසේ නැත්නම් පිරිසිදු පොල් තෙල් ස්වල්පයක් ආලේප කරන්න. මෙමගින් හිසකෙස්වල ඇතිවන විවිධ ලෙඩ රෝග මෙන්ම අකලට හිසකෙස් හැලීම ආදිය නැති කර හිසකෙස් වර්ධනය කිරීමට උදව් කෙරේ. තෙල් හිසෙහි ගැල්වීමට පෙර මඳක් උණුසුම් කොට තෙල් ආලේප කිරීමට හැකියාවක් ඇත්නම් එය වඩාත් සුදුසුය. හිසට තෙල් ගල්වද්දී උදේ වරැවේ ගල්වන්නටද අමතක නොකරන්න.

ආයුර්වේද වෛද්‍ය 
ඩී.එච්. තෙන්නකෝන්
හිටපු අධ්‍යක්ෂක ආයුර්වේද ශික්ෂණ රෝහල - බොරැල්ල

ලස්සන කෙස් කළඹකට නිල සම්බාහනය

ආයුර්වේදයට අනුව හිසට තෙල් ගැල්වීමෙන් හා නිල සම්බාහනය කිරීමෙන් හිසකෙස්වල නිරෝගිතාවය මෙන්ම මුහුණේ සුන්දරත්වයද රැකගත හැක.

සීතල දිය නෑමේ වාසි රැසක්