දිව පිනවන දේශීය ආහාර වට්ටෝරු

සිංහල අලුත් අවුරුද්ද ගෙවී යනවාත් සමඟම නිවෙස්වලට පැමිණෙන අමුත්තන්ගේද අඩුවක් නැත. සෑම වසරකම ඒකාකාරී ආහාරවලින් අමුත්තන් සතුටු කරනවා වෙනුවට මෙවර සුවිශේෂී වූ, පහසුවෙන් සකස් කර ගත හැකි දේශීයත්වයට නැඹුරු ආහාර වේලකින් අමුත්තන්ට සංග්‍රහ කිරීමට හැකි නම් වඩාත් යෝග්‍ය වේ. එවිට පැමිණෙන අමුත්තන්ට ද විශේෂ සතුටක් දැනෙනු ඇත. පහත දැක්වෙන්නේ මෙවර සිංහල හා හින්දු අලුත් අවුරුදු කාලයේ දී ඔබගේ නිවසට පැමිණෙන අමුතන්ට සංග්‍රහයට සුදුසු වෙනස්ම ආකාරයේ දිව පිනවන දේශීය ආහාර වට්ටෝරු කිහිපයකි.

 දොඩම් සරුවත්

පළමුව දොඩම් යුෂ , සීනී සිරප්,ජලය,කසකසා ඇට වැනිලා එකට එක්කර හොදින් මිශ්‍ර කර ගත යුතු ය.ඉන් පසු අයිස් කැටයක් පොඩිකර දමා විනාඩි කීපයක් තිබෙන්නට හැර පානය සදහා ගත හැක.සීනීවලට වතුර අඩුවෙන් යොදා උකු පැණියක් සේ උණු කර ඊට කැමති එසන්ස් වර්ගයක් සහ වර්ණ කාරකයක් යොදා සීනී සිරප් සාදා ගැනීමට පුළුවන. නූතන ජන සමාජයේ ජනප්‍රිය පානයක් වන සරුවත් ,අධික පිපාසය සමනය කිරීමේ ගුණයෙන් යුක්ත ය.

ගිතෙල් බත

ප්‍රථමයෙන්ම හාල් ගරා සෝදා පසෙකින් තබා ගත යුතු ය.පසුව බඳුනට එළඟිතෙල් දමා රත් කර රතු ලූණූ , රම්පේ,කරපිංචා දමා බැද ගැනීම කළ යුතු ය.එයට ම හාල් එකතු කොට අවශ්‍ය ප්‍රමාණයට වතුර දමා කරදමුංගු,කරාබුනැටි,කුරුඳු පොතු තලා පොට්ටනියක් බැඳ බත හා තැම්බෙන්නට ඉඩ හැරිය යුතු ය.ලියා ගත් බී ලූණු ,කජු , සුල්තානා ගැඹුරු තෙලේ බැඳ ගැනීම කළ යුතු ය.වතුර නො පෙරා බත මඳ ගින්නේ පිසෙන්නට හැර කුළු බඩු පොට්ටනිය ඉවත් කළ යුතු ය.පිසුණ බත බඳුනකට දමා බැඳ ගත් ලොකු ලූණූ , කජු , සුල්තානා,බත මත අතුරා අලංකාර කර ගත යුතු ය. පෝෂක පදාර්ථ රාශියක් අන්තර්ගත ගිතෙල් බත ගැබිණි මව්වරුන්ට විශේෂයෙන් ගුණදායක වන අතර ලොකු, කුඩා හැම දෙනට යෝග්‍ය බත් වර්ගයකි.

බහුදින මාළු ව්‍යංජනය

පළමුව මාළු කෑලි සෝදා දිය බේරෙන්නට තියා ගෙන එයට ගොරක,ගම්මිරිස්,ඉගුරු,සුදු ලූණු, වෙන වෙනම අඹරා ගත යුතු ය.රම්පේ,කරපිංචා, හීනියට ලියා කබලෙන් බැද කුඩු කර ගත යුතු ය.ඉන් පසු මෙම ද්‍රව්‍ය මිරිස් කුඩු, තුනපහ කුඩු සමග එක්තැන් කොට ලුණු වතුරෙන් තරමක උකු ද්‍රාවණයක් සාදා ගෙන එය පිසින බඳුනට දමා මාළු කෑලි එම ද්‍රාවණයේ ගිල්විය යුතු ය.ඉන් පසු ළිප තබා තරමක් සැර ගින්නේ පිසෙන්නට හැර හැඳි නොගා විටින් විට බඳුන සොළවමින් මද ගින්නේ ඉස්ම හිදෙන තුරු පිසෙන්නට හැරිය යුතු ය.ඉන් පසු මෙම බහුදින මාළු ව්‍යාංජනය සතියක් වුව ද කල් තබා ගැනීමට පුළුවන. බහුදින ගමන් බිමන් හා චාරිකාවලදී බෙහෙවින් ප්‍රයෝජනවත් මෙම බහුදින මාළු ව්‍යංජනයේ ප්‍රෝටීනමය ගුණය ඉහළ අගයක් ගනී.

කූනිස්සන් සම්බෝලය

පොල් ගෙඩියක් ගා ගත යුතු ය.කූනිස්සන් සෝදා දිය බේරෙන්නට තියා ගත යුතු ය.ඉන් පසු වියලි මිරිස්,රතුලූණු,ලුණු කැට ප්‍රථමයෙන් ගලේ අඹරා , දෙවනුව පොල් ගෙඩියෙන් ගා ගන්නා ලද පොල් අඹරා හොදින් මිශ්‍ර කර පසෙකින් තියා ගත යුතු ය.ඉන් පසු උම්බලකඩ,රම්පේ,කරපිංචා ලියා සියල්ල හොදින් කළවම් කර ළිප තබා කාල් ගාමින් මද ගින්නේ සුවද හමන තෙක් පදමට මළවා ගත යුතු ය.ඉනික්බිති සම්බෝලය බා ගෙන නිවුණු පසු දෙහි ඇඹුල් මිශ්‍ර කර කෑමට ගත හැක. ප්‍රසන්නතාවයකින් යුතු කූනිස්සන් සම්බෝලය ආහාර රුචිය වඩවන ගුණයෙන් පොහොසත් ය.

බිලිං අතුරුපස

බිලිං නටු ඉවත් කර සෝදා දිය බේරෙන්නට තියා ගත යුතු ය.ඊළගට වතුර නොදමා තැම්බිය යුතු ය.එවිට බිලිංවල ඇති වතුර පිටවේ.එම වතුර පෙරා සීනී ග්‍රෑම් 250 ක් දමා පැණි උණුකර බිලිංවලට දමා වසා තබා පසු දා යළි තැම්බිය යුතු ය.එවිට ද ජලය පිටවේ.එම ජලය ද පෙරා ගෙන සීනී ග්‍රෑම් 250 ක් දමා පැණි උණුකර බිලිංවලට දමා වසා තැම්බිය යුතු ය.පසුවදාත් බිලිං තම්බා වතුර පෙරා සීනී ග්‍රෑම් 250 ක් දමා පැණි උණුකර බිලිංවලට දමා වසා තැම්බිය යුතු ය.පසුව දා බිලිං තම්බා ඉතිරිවන වතුර ද රැගෙන සිනී ග්‍රෑම් 250 ක් දමා බුබුළු දමන පදමට පැණි උණුකර බිලිංවලට දමා බෝතලයක අසුරා ගත යුතු ය.මෙය පැරණි ක්‍රමයකි.කල් තබා ගැනීමට ද පුළුවන.

මෙලෙස සකස් කරන බිලිංවලට ගැමියෝ බිලිං මුද්දරස්පලම් කියා ද හඳුන්වනු ලබති .විටමින් සී,කැල්සියම්,පොස්පරස් අන්තර්ගතව ඇති මෙම අතුරුපස දිව පිනවන රසයෙන් අනූන ය.

උපදෙස් - ගිරිඋල්ල රිල්ලොලුවේ ලීලා රාජපක්ෂ